KEE No. 293 Meriah ukur kami o, Tuhan

KEE No. 293 : 1-4 (Meriah ukur kami o, Tuhan)

1. Meriah ukur kami o, Tuhan
    Lias ateNdu si nggo tersuan
    I gejap kami kuasaNdu mbelin
    Si erban kami k’rina terkelin
    Kam me kap si pegedangken umur
    Man baNdu kami ngataken bujur
    Kam me kap si pegedangken umur
    Man baNdu kami ngataken bujur

2. Penalemen kami suari berngi
    Kam uluna k’rina si mehuli
    M’riah ukurNdu tetap njujuri
    Lalap icur-curkenNdu rejeki
    Adina reh si serbut ngguluti
    PenampatNdu kap minter nurihi
    Adina reh si serbut ngguluti
    PenampatNdu kap minter nurihi

3. ItampekenNdu umur si gedang
    Rikut ka pe ras ukur si senang
    Bas dalin gelap ib’reNdu terang
    Kam si erbanca kami pemenang
    Keleng ateNdu la kap nggo sirang
    KuasaNdu la kal kapen teralang
    Keleng ateNdu la kap nggo sirang
    KuasaNdu la kal kapen teralang

4. Kasakai gia lit iba geluh
    M’lala ka gia musuh reh ngupuh
    Aminna doni g’rupuh tah gujuh
    La aku ndabuh la aku labuh
    Pengarapenku enteguh paguh
    Tetap ‘ku patuh tanNdu kap ngasuh
    Pengarapenku enteguh paguh
    Tetap ‘ku patuh tanNdu kap ngasuh

Syair & Lagu : R. Sembiring, 2004
Download slide PowerPoint KEE No. 293

Join Grup Telegram dan Grup WA saya untuk mendapatkan update...

KEE No. 292 Manusia nggo erdosa

KEE No. 292 : 1-3 (Manusia nggo erdosa)

1. Manusia nggo erdosa
    Meluat mekelesa
    Pusuh la bo lit damena
    Di sirang ras Dibata
    Begikenlah pendiloNa
    Ikutkenlah kataNa
    Geluh pelimbaruiNa
    Rembak kita ras Ia

2. Megati meganjang ukur
    Nogan nimbak kataNa
    Piah dungna latih rukur
    Di sirang ras Dibata
    Begikenlah pendiloNa
    Malang erlajar baNa
    Di mberat pe bas geluhta
    Menahang di ras IA

3. Di kita la mediate
    Man teman ras jabunta
    I ja pe la malem ate
    Disirang ras Dibata
    Begikenlah pendiloNa
    Usih perbahanenNa
    Sampati turang senina
    Dame senang ukurta

Syair & Lagu : Krismas I. Barus, 2004
Download slide PowerPoint KEE No. 292

Join Grup Telegram dan Grup WA saya untuk mendapatkan update...

KEE No. 291 M’riah ukur kami o, Bapa

KEE No. 291 : 1-3 (M’riah ukur kami o, Bapa)

1. Reff. M’riah kal ukur kami o, Bapa
Nembah jimpuh ertoto baNdu
Kam o, Tuhan ipuji kami
Ermulia gelarNdu
    Bengket kami o, Tuhan
    Ngadap ku lebeNdu
    Reh kami muji-muji gelarNdu
    Tuhan si Badia

2. Reff. M’riah kal ukur kami o, Bapa
Nembah jimpuh ertoto baNdu
Kam o, Tuhan ipuji kami
Ermulia gelarNdu
    Ulih peranin kami
    AlokenNdu, Bapa
    E me pengataken bujur kami
    Man Bandu Dibata

3. Reff. M’riah kal ukur kami o, Bapa
Nembah jimpuh ertoto baNdu
Kam o, Tuhan ipuji kami
Ermulia gelarNdu
    Bujur ningkami baNdu
    Ban keleng ateNdu
    IcukupiNdu k’rina si perlu
    Mbelin kal kuasaNdu

Syair & Lagu : Elisabeth Tarigan, BA, 2004
Download slide PowerPoint KEE No. 291

Join Grup Telegram dan Grup WA saya untuk mendapatkan update...